កាលពីរសៀលថ្ងៃទី៦ ខែតុលា ឆ្នាំ ២០២៥ នៅទីបញ្ជាការកណ្តាលស៊ីម៉ាក់ភ្នំពេញ ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់ បានទទួលជួបសម្តែងការគួរសម និងពិភាក្សាការងារជាមួយលោកជំទាវ Astrid Emilie Helle ឯកអគ្គរដ្ឋទូត ប្រទេសន័រវេស្សប្រចាំកម្ពុជាដែលមាននិវេសដ្ឋាននៅក្រុងបាងកកប្រទេសថៃនិងសហការី អមដំណើរដោយលោកHans Risser ប្រធានអង្គការNPA ប្រចាំនៅកម្ពុជា។ ឯកឧត្តមប្រតិភូ បានជម្រាបជូនលោកជំទាវឯកអគ្គរដ្ឋទូត អំពីលទ្ធផលការងារនៃវិស័យមីននៅកម្ពុជានិងសមិទ្ធិផលសម្រេចបានរបស់អង្គភាពCMAC ជាពិសេសកិច្ចសហការជាមួយអង្គការ Norwegian People’s Aid (NPA) ដែលជាដៃគូយ៉ាងជិតស្និតរបស់អង្គភាពCMAC ជាង៣៣ឆ្នាំមកហើយ ពោលគឺចាប់តាំងពីឆ្នាំ១៩៩២រហូតមកដល់បច្ចុប្បន្ន។ ជំនួយដ៏មានតម្លៃរបស់ប្រជាជននិងរដ្ឋាភិបាលន័រវេស្ស បានរួមចំណែកយ៉ាងសំខាន់ក្នុងការជួយដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការលុបបំបាត់គ្រាប់មីន និងសំណល់យុទ្ធភណ្ឌសង្គ្រាម ដើម្បីការពារអាយុជីវិតប្រជាពលរដ្ឋកម្ពុជា និងចូលរួមពង្រឹងសន្តិភាព ព្រមទាំងការអភិវឌ្ឍសេដ្ឋកិច្ចសង្គមជាតិឡើងវិញក្រោយសង្គ្រាមបានបិទបញ្ចប់។

នៅក្នុងជំនួបពិភាក្សាការងារ ក៏មានការផ្លាស់ប្តូរយោបល់គ្នា អំពីស្ថានការណ៍ជម្លោះព្រំដែនកម្ពុជា-ថៃ ដែលជាបញ្ហាសំខាន់ត្រូវការ ការតាមដាន ជាពិសេសផលប៉ះពាល់យ៉ាងធ្ងន់ធ្ងរពីសំណល់យុទ្ធភណ្ឌសង្គ្រាមគ្រប់ប្រភេទរបស់ថៃដែលបានបាញ់មកលើដែនអធិបតេយ្យនិងភូមិដ្ឋានរបស់ប្រជាពលរដ្ឋកម្ពុជា។ ក្នុងកាលៈទេសៈនេះ រាជរដ្ឋាភិបាលកម្ពុជាក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត បាននិងកំពុងគោរពអនុវត្តកិច្ចព្រមព្រៀងបទឈប់បាញ់ យ៉ាងម៉ឺងម៉ាត់និងសង្កត់ចិត្តយ៉ាងអត់ធ្មត់បំផុត សំដៅសម្រេចបានសន្តិភាពសម្រាប់ប្រទេសនិងប្រជាជនជិតខាងគ្នាទាំង២។ ជាការឆ្លើយតប លោកជំទាវឯកអគ្គរដ្ឋទូត បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់រាជរដ្ឋាភិបាលក្នុងវិស័យមីននៅកម្ពុជា ដែលបានសម្រេចសមិទ្ធផលយ៉ាងធំធេងនិងជាគំរូល្អស្របតាមស្មារតនៃការអនុសញ្ញាគ្រាប់មីនប្រឆាំងមនុស្សអូតាវ៉ា។ លោកជំទាវ ក៏បានបញ្ជាក់បន្ថែមថា ប្រទេសន័រវេស្ស មានក្តីសោមនស្សក្នុងការធ្វើកិច្ចសហប្រតិបត្តិការជាមួយកម្ពុជាលើវិស័យសកម្មភាពមីន ដើម្បីរួមចំណែកក្នុងការអភិវឌ្ឍ សង្គមជាតិឱ្យកាន់តែរីកចម្រើនបន្ថែមទៀត ព្រមទាំងបានបញ្ជាក់ជំហរថា រដ្ឋាភិបាលន័រវេស្សនឹងបន្តគាំទ្រកម្ពុជា

តាមរយៈអង្គការNPA ក្នុងការបោសសម្អាតមីន ការអប់រំអំពីគ្រោះថ្នាក់ដោយសារមីន និងការអភិវឌ្ឍសហគមន៍ក្រោយបោសសម្អាតមីនរួច។ លោកជំទាវក៏បានបញ្ជាក់បន្ថែមថា រដ្ឋាភិបាលន័រវេស្សពិតជាចង់ឃើញ ការអនុវត្តពីបទឈប់បាញ់ឱ្យបានម៉ឺម៉ាត់ និងស្តារសន្តិភាពឡើងវិញ ដែលនេះជាឧត្តមប្រយោជន៍សម្រាប់ប្រទេសនិងប្រជាជនទាំង២ ក៏ដូចជាប្រទេសក្នុងតំបន់ និងក្នុងសកលលោកផងដែរ។ ក្នុងពេលនោះដែរ លោកHans Risser ក៏បានបញ្ជាក់ពីជំហរបន្ថែមថា អង្គការ NPA និងបន្តសហការជាមួយអង្គភាពCMAC ក្នុងរយៈពេល៥ឆ្នាំពោល គឺ (២០២៦-២០៣០)បន្តទៀត តាមរយៈអង្គការ NPA ទទួលជំនួយពីរដ្ឋាភិបាលន័រវេស្ស និងសហរដ្ឋអាម៉េរិកក៏ដូចជាម្ចាស់ជំនួយមួយចំនួនទៀត។ មុននឹងបញ្ចប់ លោកជំទាវឯកអគ្គរដ្ឋទូតប្រទេសន័រវេស្ស Astrid Emilie Helle ក៏បានបង្ហាញនូវក្ដីសោកស្តាយនិងចូលរួមរំលែកទុក្ខយ៉ាងជ្រាលជ្រៅ ចំពោះការបាត់បង់ជីវិត និងទ្រព្យសម្បត្តិរបស់ប្រជាពលរដ្ឋកម្ពុជា ដោយសារសង្គ្រាមរយៈពេល៥ថ្ងៃរវាងកម្ពុជា-ថៃ។

• 
• 
• 
•